तगमग

का ही अशी तगमग 

आणि वेडा अट्टाहास.. 

कातरल्या वेळी अश्या 

मनी चांदण्याचा भास !!

यायचे न आज कुणी

वाट वाहे सुनी सुनी.. 

तरी वारा रुंजी घाले 

अडवितो अर्धा श्वास !! 

मानेभोवती स्वत:च्या  

आपलाच करपाश.. 

सोसवेना आता तरी 

नव्या वेदनेचा ध्यास !!

अष्टौप्रहर असा हा 

खेळ चाले प्राक्तनाचा.. 

माझ्या श्वासासंगे चाले  

तुझ्या आठवांचा रास !!! 

- भक्ती आजगावकर 

दोन प्रसंग

एक मेसेज.. दोन फ़ोन...
उत्तर नाही अन आपली तणतण...
वाट पाहणे .. रागावणे अन् सरते शेवटी काळजी ...
मग एक स्फोट ..

सुट्टी... रुटीन मधून एक ब्रेक
नातेवाईक ..मैत्रिणी .. मज्जा ..मोकळीक
मनाच्या एका कोपऱ्यात हुरहुरती आठवण ...
तरी "न केलेला मेसेज" ..ही पहिल्या प्रसंगाची शिकवण

अन् मग शल्य ...
कोणती जाणीव खरी... कोणते भाव खरे...

अश्या सलील सीमेवर झुलणे का ...
अश्या आंदोलनांनी हलणे का...
आपण आपण आपलेच तरी
इतके अनोळखी जगणे का..

- भक्ती आजगावकर